بەرپرسی نووسینگەی نوێنەرایەتی ڕێبەری باڵا لە زانکۆی کوردستان جەختی لەسەر پێویستی ئاسانکاری بۆ ئامادەبوونی خوێندکاران و زانکۆییەکان لە ڕێوڕەسمی ئەربەعین کردەوە و ڕایگەیاند: ئاڕاستەکردنی بەشێک لە تواناکان و بودجەی ئەربەعین بەرەو موکێبە خوێندکارییەکان دەتوانێت یارمەتیدەر بێت بۆ بەهێزکردنی ئەم ئامادەبوونە.

بەپێی ڕاپۆرتی پەیوەندییە گشتییەکانی زانکۆی کوردستان؛ حوجەتولئیسلام عابدین ڕۆستەمی، ڕۆژی یەکشەممە ٢٨ی پووشپەڕی ١٤٠٥ لە کۆبوونەوەی هەماهەنگی بەرنامەکانی ئەربەعینی حسێنی و بەڕێوەچوونی کۆنگرەی شەهیدان بە ئامادەبوونی بەرپرسانی زانکۆکان و کەرتە پەیوەندیدارەکان، وێڕای جەختکردنەوە لەسەر پێویستی بەهێزکردنی ڕۆڵی زانکۆییەکان لە ئەربەعین، ڕایگەیاند: دەبێ هەوڵ بدرێت بەشێک لەو توانا و بودجەیەی بۆ ئەربەعین تەرخان کراوە، بەرەو موکێبە خوێندکارییەکان سوق بدرێت.

ناوبراو بە ئاماژەدان بەوەی کە دەبێ هەموومان پەرەپێدەر و بڵاوکەرەوەی کولتووری ئەربەعین بین، وتیشی: ئەگەر ڕوانینمان بۆ ئەربەعین ڕوانینێکی شارستانی نەبێت، ڕێگاکە ون دەکەین و ناتوانین زۆرێک لە تواناکان پێکەوە گرێ بدەین.

ئەم بەرپرسە ئەربەعینی بە توانایەک بۆ جیهانی ئیسلام زانی و زیادی کرد: ئەمڕۆ زۆرێک لە تواناکانی جیهانی ئیسلام لە ڕێگەی ئەربەعینەوە شێوە دەگرن و گەورەترین ترسی سیستەمی زاڵ و ئیستیکباریش هەر لەم توانایەی ئەربەعینەیە.

حوجەتولئیسلام ڕۆستەمی لە کۆتاییدا وێڕای جەختکردنەوە لەسەر پێویستی ئاسانکاری بۆ ئامادەبوونی بژاردەکان، زانکۆییەکان و خوێندکاران لە ئەربەعین، وتی: ئامادەبوونی بەردەوام و چالاکانەی زانکۆییەکان و خوێندکاران لە ناوەوە و دەرەوەی پارێزگا و تەنانەت لە وڵاتی عێراقیش، هەنگاوێکی کاریگەر دەبێت لە پێشبردنی ئەم جووڵەیەدا.