لەم کۆڕەدا زەمینە مێژووییەکانی سەرهەڵدانی ئەم بەرهەمە، چەمکی ڕۆژئاوا لە ئەندێشەی ئال ئەحمەد و گرنگترین ڕەگەزە فکری و ڕەخنەییەکان سەبارەت بە گۆڕانکارییە کۆمەڵایەتی، کولتووری و سیاسییەکانی ئێرانی هاوچەرخ تاوتوێ کران.

بەپێی ڕاپۆرتی پەیوەندییە گشتییەکانی زانکۆی کوردستان؛ کۆڕی زانستیی خوێندنەوەی کتێبی "ڕۆژئاواپەرستی" ڕۆژی یەکشەممە، ١٠ی جۆزەردانی ١٤٠٥، بە ئامادەبوونی دکتۆر بابەک سووری، ئەندامی دەستەی زانستیی زانکۆی کوردستان، لە هۆڵی کۆبوونەوەکانی سەرۆکایەتی زانکۆ بەڕێوە چوو. لەم دانیشتنەدا یەکێک لە گرنگترین بەرهەمە فکری و ڕەخنەییەکانی مێژووی هاوچەرخی ئێران لە ڕوانگەی مێژوویی، کۆمەڵایەتی و کولتوورییەوە لێک درایەوە.

لە دەستپێکی کۆڕەکەدا، دکتۆر بابەک سووری وێڕای ڕوونکردنەوەی زەمینە مێژووییەکانی نووسینی کتێبەکە، ڕایگەیاند: "کتێبی ڕۆژئاواپەرستی لە ساڵی ١٣٤١ی هەتاویدا نووسراوە؛ قۆناغێک کە لەژێر کاریگەریی ڕووداوە گرنگەکانی مێژووی هاوچەرخی ئێراندا بوو." ناوبراو ئاماژەی بە ژیان و بەرهەمەکانی جەلال ئال ئەحمەد کرد و وتی: "وی لە ساڵی ١٣٠٢ لە تاران لەدایک بووە و لە ساڵی ١٣٤٨ کۆچی دوایی کردووە، سەرەڕای تەمەنی کورتی، بەرهەمی هەمیشەیی لە ئەدەبیاتی هاوچەرخی فارسیدا بەجێهێشتووە کە کتێبی ڕۆژئاواپەرستی یەکێک لە دیارترینیانە."

دکتۆر سووری سەبارەت بە چەمکی ڕۆژئاوا لە دیدی ئال ئەحمەدەوە وتی: "جەلال ئال ئەحمەد چەمکی ڕۆژئاوای تەنیا وەک ناوچەیەکی جوگرافی نەدەبینی، بەڵکوو بە بڕوای ئەو، ڕۆژئاوا بەو کۆمەڵگایانە دەوترێت کە بەرهەمهێنانیان لەسەر بنەمای تەکنەلۆژیا و پیشەسازییە، لە کاتێکدا جیهانی ناڕۆژئاوایی ئەو وڵاتانەن کە کەرەستەی خاویان هەیە بەڵام خاوەنی پیشەسازی و بەرهەمهێنان نین." بەپێی ئەم پێناسەیە، ئێران و زۆرێک لە وڵاتانی ڕۆژهەڵاتی لەو سەردەمەدا لە ڕیزی کۆمەڵگە ناڕۆژئاواییەکاندا بوون و وڵاتانی وەک بەریتانیا، ئەمریکا و وڵاتانی پیشەسازی ئەورووپا وەک جیهانی ڕۆژئاوا دەناسران.

بە وتەی دکتۆر سووری، ئال ئەحمەد لە بەشی سێیەمی کتێبەکەدا، ڕۆژئاواپەرستی وەک جۆرە نەخۆشییەکی کۆمەڵایەتی دەناسێنێت؛ نەخۆشییەک کە لە چاوپۆشی، وابەستەیی و شەیدابوون بە ڕۆژئاوا و دیاردەکانییەوە سەرچاوە دەگرێت. هەروەها پێی وایە کۆمەڵگەیەک کە تەنیا بەکاربەر بێت و توانای بەرهەمهێنانی سەربەخۆی نەبێت، بێگومان تووشی ئەم نەخۆشییە دەبێت.

دکتۆر سووری لە درێژەی قسەکانیدا ئاماژەی بە ڕۆڵی ڕاوێژکاران، گەشتیاران و نوێنەرانی هێزە ڕۆژئاواییەکان لە گۆڕانکارییەکانی ئێراندا کرد و وتی: "ئال ئەحمەد پێی وابوو بەشێکی گرنگ لە گۆڕانکارییە فکری و کولتوورییەکانی ئێرانی هاوچەرخ لەژێر کاریگەریی ئامادەبوون و دەسەڵاتی ئەواندا دروست بووە." هەروەها لەسێدارەدانی شێخ فەزڵوڵڵا نووری وەک نیشانەیەک لە پاشەکشەی ڕەوتی نەریتی و ئایینی لە بەرانبەر دەسەڵاتی ڕۆژئاوادا لێک دەدایەوە.

هەروەها ئاماژەی بەوە کرد کە ئال ئەحمەد ڕەخنەی توندی لە ڕۆژهەڵاتناسی هەبووە و وەک ئامرازێک لە خزمەت بەرژەوەندییە کۆلۆنیالییەکانی ڕۆژئاوادا دەیناسی. لە دیدی ئەوەوە، زۆرێک لە ڕۆژهەڵاتناسان لە تەنیشت چالاکییە زانستییەکانیان، لە خزمەت پڕۆژە سیاسی و ئیستیعمارییەکاندا بوون. هەروەها ڕەخنەی لە دامەزراوە نێودەوڵەتییەکانی وەک نەتەوە یەکگرتووەکان، یونسکۆ، بانکی جیهانی و سندوقی نێودەوڵەتیی دراو هەبوو و وەک ئامرازێک بۆ بەرژەوەندیی هێزە گەورەکانی ڕۆژئاوا دەیناساندن.

لە کۆتاییدا دکتۆر سووری جەختی کردەوە کە یەکێک لە گرنگترین ڕێگەکانی ئال ئەحمەد بۆ ڕزگاربوون لە ڕۆژئاواپەرستی، گەیشتن بە توانای بەرهەمهێنانی سەربەخۆیە. ئال ئەحمەد پێی وابوو تا ئەو کاتەی وڵاتانی ڕۆژهەڵاتی تەنیا بەکاربەری تەکنەلۆژیا و بەرهەمەکانی کەسانی تر بن، لە وابەستەیی ڕزگاریان نابێت. کۆمەڵگەیەک دەتوانێت سەربەخۆ بێت کە توانای بەرهەمهێنانی تەکنەلۆژیا و ئامرازە پێویستەکانی خۆی هەبێت و تەنیا بەکاربەری دەستکەوتەکانی کەسانی تر نەبێت.