ئەندامێکی دەستەی زانستیی کۆلێژی کشتوکاڵی زانکۆی کوردستان، لە هەڵبژاردنی دەستەی سەرۆکایەتیی بەشی سێیەمی کۆمیسیۆنی نێودەوڵەتیی ئەندازیاریی کشتوکاڵ و بایۆسیستەم (CIGR) وەک سکرتێری ئەم کۆمیسیۆنە هەڵبژێردرا.

بەپێی ڕاپۆرتی پەیوەندییە گشتییەکانی زانکۆی کوردستان؛ لە کۆبوونەوەی دەستەی بەڕێوەبەریی بەشی سێیەمی ئەم ڕێکخراوە کە لە ٢٤ی حوزەیرانی ٢٠٢٦ (٣ی پووشپەڕی ١٤٠٥) هاوکات لەگەڵ حەوتەمین کۆنفرانسی نێودەوڵەتیی سی‌ئای‌جی‌ئاڕ (7th CIGR International Conference) بە شێوەی ڕووبەڕوو و مەجازی لە شاری تۆرینۆی ئیتاڵیا بەڕێوە چوو، یەکێک لە بەرنامەکانی کۆبوونەوەکە ئەنجامدانی هەڵبژاردنی دەستەی سەرۆکایەتی نوێ بوو کە بەپێی ئەنجامی دەنگەکان، دکتۆر هیوا گوڵپیرا ئەندامی دەستەی زانستیی کۆلێژی کشتوکاڵی زانکۆی کوردستان وەک سکرتێری ئەم کۆمیسیۆنە نێودەوڵەتییە بۆ چوار ساڵی داهاتوو هەڵبژێردرا.

کۆمیسیۆنی نێودەوڵەتیی ئەندازیاریی کشتوکاڵ و بایۆسیستەم (CIGR) لە ساڵی ١٩٣٠ لە شاری لیێژی بەلجیکا دامەزراوە. ئەم ڕێکخراوە یەکێکە لە باوەڕپێکراوترین ناوەندە زانستییە ناحکومییەکان لە بواری ئەندازیاریی کشتوکاڵدا کە بە ئامانجی بەرزکردنەوەی زانیاریی تەکنیکی، ئاسانکاریی هاوکارییە نێودەوڵەتییەکان و بەدیهێنانی گەشەپێدانی بەردەوام لە بەرهەمهێنانی خۆراک، وزە و زیندەبارستەدا چالاکی دەکات.

ئەم کۆمیسیۆنە حەوت بەشی پسپۆڕی لەخۆ دەگرێت: ئاو و خاک، تەلارسازی و ژینگە، بەرهەمە ڕووەکییەکان، وزە لە کشتوکاڵدا، تەکنەلۆژیای زانیاری، بەڕێوەبردنی سیستەمەکان و خولی ژیانی زیندەیی. بەشی سێیەمی ئەم ڕێکخراوە (CIGR- Technical Sections III: Plant Production) لەسەر بنەمای توێژینەوە بنەڕەتی و پراکتیکییەکانی پەیوەست بە مەکانیزاسیۆن، ئۆتۆمەیشن و ڕێکارەکانی کشتوکاڵی دیجیتاڵ لە سیستەمە نوێیەکانی بەرهەمهێنانی بەروبوومە کشتوکاڵییەکاندا چالاکی دەکات.

هەڵبژاردنی دکتۆر هیوا گوڵپیرا بۆ ئەم پۆستە نێودەوڵەتییە، هەنگاوێکی کاریگەرە لە بەرزکردنەوەی پێگەی زانستی و کارگێڕیی توێژەرانی زانکۆی کوردستان لە بواری ئەندازیاریی کشتوکاڵ و مەکانیزاسیۆن لە ئاستی جیهانیدا و نیشاندەری توانای پسپۆڕانی ئەم زانکۆیەیە لە کارلێککردن لەگەڵ ناوەندە پێشەنگە نێودەوڵەتییەکاندا.

جێگری سەرۆکی زانکۆ بۆ کاروباری توێژینەوە، تەکنەلۆژیا و داهێنان، ئەم سەرکەوتنە لە دکتۆر گوڵپیرا پیرۆز دەکات و هیوای سەرکەوتنی بۆ دەخوازێت لە بواری هاوکارییە زانستییە نێودەوڵەتییەکاندا.