بەپێی ڕاگەیاندنی بەشی پەیوەندییە گشتییەکانی زانکۆی کوردستان، هاوکات لەگەڵ حەفتەی توێژینەوە، پێشانگای «توێژینەوە و بازاڕی تەکنیکی پارێزگای کوردستان» ڕۆژی دووشەممە، ١٠ی سەرماوەز، بە ئامادەبوونی سەرۆک و ئەندامانی ئەنجومەنی زانکۆی کوردستان و کۆمەڵێک لە بەرپرسان و توێژەرانی پارێزگا لە هۆڵی مەولەویی زانکۆ کرایەوە.

ڕێوڕەسمی کردنەوەی پێشانگاکە بە لێدانی فەرمیی زەنگی توێژینەوە دەستی پێ کرد. لە درێژەدا، جێگری سەرۆکی زانکۆ بۆ کاروباری توێژینەوە و داهێنان، جەختی لەسەر گرنگیی ناساندنی توانستە توێژینەوەیی و تەکنەلۆژییەکانی پارێزگا و پێویستیی بەهێزکردنی پەیوەندیی نێوان زانکۆ، پیشەسازی و کۆمەڵگە کردەوە.

ئەم پێشانگایە کە بە بەشداریی دامەزراوە جێبەجێکارەکان و ناوەندە زانکۆییەکان ساز کراوە، ١٢ غورفە لەخۆ دەگرێت کە تێیدا ٦٥ بەرهەمی تەکنەلۆژی و دەستکەوتی زانستی و توێژینەوەیی پارێزگا خراونەتە بەر دیدی گشتی.
جێگەی باسە، پێشانگای توێژینەوە و بازاڕی تەکنیک سبەی، سێشەممە ١١ی سەرماوەزیش، لە هۆڵی مەولەویی زانکۆی کوردستان کراوە دەبێت و سەردانیکردنی بۆ گشت ئارەزوومەندان، قوتابییان و توێژەران ئازادە.