ناساندنی کۆلێژ
کۆلێژی ھونەر و تەلارسازیی زانکۆی کوردستان لە ساڵی ٢٠١٣ی زایینی دامەزراوە. ئەم کۆلێژە تا مانگی ئۆکتۆبەری ٢٠٢٥، ١٠١٤ خوێندکاری هەیە کە لە پێنج بەشی ئەکادیمی: ئەندازیاریی تەلارسازی، ئەندازیاریی شارسازی، مۆسیقا، پیشە دەستییەکان و دەرھێنان لە ئاستی بەکالۆریۆس، و لە چوار پسپۆڕیی: پلاندانانی شار، دیزاینی شار، تەلارسازی-تەلارسازی و تەلارسازی-وزە لە ئاستی ماستەردا، سەرقاڵی خوێندنن.
پێش ساڵی ٢٠١٣، بەشی تەلارسازی لە ساڵی ١٩٩٩ەوە و بەشی شارسازی لە ساڵی ٢٠٠٦ەوە وەک بەشێک لە کۆلێژی ئەندازیاری و تەکنیکیی زانکۆ چالاک بوون. ھەروەھا، کۆلێژەکە لە ساڵی ٢٠١٩ەوە خوێندکار لە ئاستی دکتۆرا لە بەشی شارسازیدا وەردەگرێت و لە ئێستادا ٢٣ خوێندکار لەم ئاستەدا دەخوێنن.
لە چوارچێوەی فراوانکردنی بەشە زانستییەکاندا، لە ساڵی ٢٠١٩ەوە ئامادەکاریی پێویست بۆ کردنەوەی بەشەکانی شوێنەوارناسی، شاری ھۆشمەند، و تەلەڤیزیۆن و ھونەرە دیجیتاڵییەکان کراوە و بانگەواز بۆ دامەزراندنی ئەندامی دەستەی مامۆستایان لەم بوارانەدا ڕاگەیەندراوە.
دیدگا و ئاسۆی کۆلێژی ھونەر و تەلارسازی، وەک ناوەندێکی خوێندنی باڵا لە بوارەکانی تەلارسازی، شارسازی و ھونەرەکانی مۆسیقا و پیشە دەستییەکان، بریتییە لە بوون بە پردێکی پەیوەندی لە نێوان کۆمەڵگە و زانکۆ لە پارێزگاکەدا، ھەروەھا دامەزراندنی ناوەندێکی زانستی-ھونەری لەسەر ئاستی نیشتمانی و ناوچەیی.
یەکێک لە دەستکەوتەکانی کۆلێژ، دەرکردنی گۆڤاری زانستی-توێژینەوەیی "خوێندنەوە شارستانییەکان" (ISC)ە لە ساڵی ٢٠١٨ەوە، کە پلەی یەکەمی لەنێو گۆڤارەکانی بواری شارسازیدا بەدەستھێناوە و خاوەنی ڕیزبەندیی Q1ە. دەستکەوتێکی دیکەی کۆلێژ، دامەزراندنی "ناوەندی زانستیی چاکسازی و بووژاندنەوەی شار"ە، کە لە سەرەتای ساڵی ٢٠١٩ەوە دەستی بە کارەکانی کردووە و شوێنێکی تایبەتی لە کۆلێژەکەدا بۆ چالاکییەکانی تەرخان کراوە.
لە ساڵی ٢٠٢٥دا، کۆلێژەکە ٢٣ ئەندامی دەستەی مامۆستایانی ھەمیشەیی یان گرێبەستی ھەیە، کە پێکدێن لە یەک پرۆفیسۆر، پێنج پرۆفیسۆری یاریدەدەر، نۆ مامۆستای یاریدەدەر و ھەشت ڕاھێنەر. ھەروەھا کۆی گشتیی خوێندکاران ١٠١٤ کەسە، کە ٧٧٥ خوێندکاری بەکالۆریۆس، ٢١٢ خوێندکاری ماستەر و ٢٦ خوێندکاری دکتۆرا لەخۆدەگرێت.
کۆلێژی ھونەر و تەلارسازی تا ئێستا سەرکەوتوو بووە لە واژۆکردنی یاداشتی لێکگەیشتن لەگەڵ چەندین ڕێکخراو و دامەزراوەی جیاوازدا، کە گرنگترینیان بریتین لە یاداشتی ھاوکاری لەگەڵ زانکۆی کۆپنھاگنی دانیمارک، ڕێکخراوی میراتی فەرھەنگیی پارێزگای کوردستان، و ناوەندی ھونەریی پارێزگای کوردستان.
باڵەخانەی کۆلێژی ھونەر و تەلارسازی لە دوو قۆناغدا دیزاین کراوە؛ قۆناغی یەکەمی لە ساڵی ٢٠١٣ەوە خراوەتە بواری جێبەجێکردنەوە و قۆناغی دووەمیشی لە قۆناغە ئیداری و سەرەتاییەکاندایە، کە لە ئەگەری دابینکردنی بودجەدا جێبەجێ دەکرێت.
