بەپێی ڕاگەیاندنی بەشی پەیوەندییە گشتییەکانی زانکۆی کوردستان، ڕێوڕەسمی کۆتاییی ئەم کێبڕکێیانە بە ئامادەبوونی بەرپرسان و وەرزشکاران لە هۆڵی وەرزشیی ژمارە ٢ی زانکۆی کوردستان بەڕێوە چوو و تیمە سەرکەوتووەکان ناسێندران.
لەم پاڵەوانێتییەدا، ٨ تیم بەشدار بوون کە پێکهاتبوون لە دوو تیم لە زانکۆی کوردستان (ئەلف و ب)، زانکۆی ئازادی ئیسلامی، زانکۆی فەرهەنگیان، زانکۆی جامی علمی-کاربردی، بەڕێوەبەرایەتیی گشتیی پەروەردە و دوو تیم لە پارکی زانست و تەکنەلۆژیا، کە لە چوارچێوەی دوو گرووپی چوار تیمیدا ڕکابەرییان کرد.

دوای کۆتاییهاتنی قۆناغی گرووپی و سەرکەوتنی چوار تیمی یەکەم بۆ قۆناغی کۆتایی، یارییەکانی دیاریکردنی پلەکان و فیناڵ بەڕێوە چوون. لە ئەنجامدا، تیمی بەڕێوەبەرایەتیی گشتیی پەروەردە بە پێشکەشکردنی یاریی درەوشاوە توانیی نازناوی پاڵەوانێتی بەدەست بهێنێت و تیمی زانکۆی فەرهەنگیان پلەی دووەمی مسۆگەر کرد.
تیمی زانکۆی کوردستان (میوانداری کێبڕکێکان)یش لە پلەی سێیەمدا جێگیر بوو و تیمی زانکۆی ئازادی ئیسلامی پلەی چوارەمی بەدەست هێنا.

جێگەی باسە لە ڕێوڕەسمی کۆتاییدا، بە پێشکەشکردنی بڕوانامەی ڕێزلێنان و خەڵات، ڕێز لە تیمە سەرکەوتووەکان و بەشداربووان گیرا.