نوێنەری وەلی فەقێ لە پارێزگای کوردستان بە ئاماژەدان بە تایبەتمەندییە کەسایەتی و بەڕێوەبەرییەکانی ڕێبەری باڵای شۆڕش، ڕایگەیاند: دیدگای یەکگرتوویی‌خوازانە، بەڕێوەبردنی قەیرانەکان، گرنگیدان بە بەرهەمهێنانی فکر و پەروەردەکردنی نەوەی گەنجی شۆڕشگێڕ لە گرنگترین تایبەتمەندییەکانی بەڕێزیان بووە.

بەگوێرەی ڕاپۆرتی پەیوەندییە گشتییەکانی زانکۆی کوردستان؛ حوجەتولئیسلام وەلموسلیمین پوورزەهەبی، ڕۆژی یەکشەممە ٢٧ی گوڵان (ئەردیبەهەشت) لە ڕێوڕەسمی ساڵیادی ئامادەبوونی ڕێبەری شەهیدی شۆڕش لە نێوان زانکۆییانی پارێزگای کوردستاندا، بە ئاماژەدان بە جەختکردنەوەی ڕێبەری باڵا لەسەر ڕۆڵی زانکۆکان لە پەروەردەکردنی نەوەی گەنج، ڕایگەیاند: بەڕێزیان هەمیشە لەو بڕوایەدا بوون کە زانکۆ دەبێت گەنجانی ئیماندار، شۆڕشگێڕ، نیشتمانپەروەر، سەربەخۆیی‌خواز و دژە ئیستکبار پەروەردە بکات و ئەم بابەتەی بە ئەرکێکی گرنگی بەڕێوەبەران و بەرپرسانی زانکۆ دەزانی.

نوێنەری وەلی فەقێ لە کوردستان بە ڕاگەیاندنی ئەوەی کە ڕێبەری باڵا دیدگایەکی قووڵی بۆ پرسە کولتووری، کۆمەڵایەتی و سیاسییەکان هەیە، وتیشی: زاڵبوونی بەڕێزیان بەسەر بابەتگەلێکی وەک مێژوو، ئەدەبیات، مۆسیقا، سینەما و پرسە ڕۆژەڤەکانی کۆمەڵگا نیشاندەری گشتگیری فکری و خوێندنەوەی بەرفراوانی بەڕێزیانە.

حوجەتولئیسلام پوورزەهەبی هەروەها وشەسازی و خولقاندنی وشەی کاریگەری وەک تایبەتمەندییەکی دیکەی ڕێبەری شەهیدی شۆڕش ناوبرد و وتی: زۆرێک لە چەمک و وشە سەرەکییانەی کە ئەمڕۆ لە ئەدەبیاتی سیاسی و کولتووری وڵاتدا باون، بەرهەمی دیدگا و ئەندێشەی بەڕێزیانە لە ڕوونکردنەوەی پرسەکانی کۆمەڵگادا.

ناوبراو بە ئاماژەدان بە بەڕێوەبەریی ڕێبەری باڵا لە ڕووبەڕووبوونەوەی قەیرانە جۆراوجۆرەکانی وڵات، جەختی کردەوە: تێپەڕبوونی وڵات لە قەیرانە جۆراوجۆرەکانی دوای شۆڕش نیشاندەری ئەزموون، ژیری و هێزی ڕێبەرایەتی بەڕێزیانە لە بارودۆخە سەختەکان و ڕووبەڕووبوونەوەی قەیرانە جیاوازەکاندا.

نوێنەری وەلی فەقێ لە کوردستان لە کۆتاییدا، دیدگای یەکگرتوویی‌خوازانەی ڕێبەری باڵای وەک یەکێک لە گرنگترین هۆکارەکانی یەکگرتوویی نەتەوەیی زانی و ئاماژەی بەوە کرد: جەختکردنەوەی بەڕێزیان لەسەر یەکگرتوویی نێوان نەتەوەکان، ئایینەکان و ڕەوتە جیاوازەکان، بەتایبەت لە پارێزگای کوردستان، هەمیشە سەرچاوەی هاودڵی و ئارامی بووە لە کۆمەڵگادا.